புத்தகத்தின் பெயர்: உடலினை உறுதி செய்
ஆசிரியர்: சைலேந்திரபாபு
பக்கங்கள்: 215
வகைமை: கட்டுரை / சுய முன்னேற்றம் / ஆரோக்கியம்

“உடலினை உறுதி செய்” என்ற தலைப்பே இந்த புத்தகத்தை கையில் எடுக்க தூண்டும். தலைப்புக்கு ஏற்றவாறு, உடல் நலம் குறித்து பல விஞ்ஞான அடிப்படையிலான கருத்துகளை சைலேந்திரபாபு தெளிவாக எடுத்துரைக்கிறார். இந்த நூல் உடலுக்கு மட்டும் அல்லாமல் மனம், உறவுகள், சந்தோஷம், ஒழுக்கம், தியானம், உறக்கம் போன்ற வாழ்க்கையின் பல பரிமாணங்களையும் ஆராய்கிறது. குறிப்பாக உணவு பற்றிய அவரது விளக்கங்கள் மிகவும் நேர்த்தியாகவும், நடைமுறைக்கு ஏற்றவாறும் உள்ளன.

இந்த புத்தகத்தை 10 வருடங்களுக்கு முன்பே படித்திருக்கலாம் என்ற எண்ணம் இயல்பாகவே வருகிறது. உடற்பயிற்சி செய்ய நேரமில்லை என்று கூறுபவர்களை ஆசிரியர் நேராக சாடுகிறார்: “இப்போது உடற்பயிற்சிக்கு நேரம் ஒதுக்கவில்லை என்றால், பின்னர் மருத்துவமனையில் நேரம் செலவிட வேண்டிய நிலை வரும்” என்ற கருத்து மிக தாக்கம் செய்கிறது.

தியானத்தைப் பற்றி பேசும் போது, கண்களை மூடி அமைதியாக உட்கார்வது மட்டுமே தியானம் அல்ல; எந்த செயலையும் கவனச்சிதறல் இல்லாமல் செய்வதும் தியானமே என்கிறார். இதற்கு பல உதாரணங்கள் கொடுக்கப்பட்டுள்ளன. வாசிப்பையும் இதில் சேர்த்திருக்கலாம் என்ற எண்ணம் தோன்றுகிறது.

நம் வழக்கமான “மனம் சொன்னதை உடல் கேட்கும்” என்ற கருத்துக்கு மாறாக, உடற்பயிற்சியில் “உடல் சொல்வதை மனம் கேட்கும்” என்ற அணுகுமுறை சிந்திக்க வைக்கிறது. உடல் வலி கூட ஒரு கட்டத்தில் பழக்கமாக மாறும் என்கிறார்.

VDL, HDL, LDL போன்ற கொலஸ்ட்ரால் வகைகள் குறித்து தெளிவான விளக்கம் வழங்கப்படுகிறது. மேலும், “கவலை என்பது இயற்கையானது அல்ல; மனிதன் உருவாக்கிய ஒன்று” என்ற கருத்தையும் வலியுறுத்துகிறார்.

சில இடங்களில் கூறப்படும் விஷயங்கள் சற்றே மிகைப்படுத்தலாக தோன்றினாலும், மொத்தத்தில் நூல் பயனுள்ள தகவல்களால் நிரம்பியுள்ளது. சினிமா மற்றும் கிரிக்கெட் மீது ஆசிரியரின் விமர்சன பார்வையும் வெளிப்படையாக தெரிகிறது.

முடிவாக, “உடலினை உறுதி செய்” என்பது ஒவ்வொருவரின் புத்தக அலமாரியிலும் இருக்க வேண்டிய ஒரு முக்கியமான ஆரோக்கிய நூல். உடல் மற்றும் மனநலத்தை சமநிலைப்படுத்த விரும்புபவர்களுக்கு இது ஒரு பயனுள்ள வழிகாட்டி.